Jatorria
Coop57 Katalunian eratu zen, Bruguera argitaletxeko langileek beren lanpostuei eusteko borrokatik abiatuta. 1986an, Espainiako ekonomiaren industria-krisi handi baten erdian, Bruguera argitaletxe ezaguna bideraezintzat jo zen eta Banco de Crédito Industrial-en esku geratu zen. Enpresa birmoldatzeko, kooperatiba bihurtzeko edo eroslea bilatzeko saiakeren ondoren, bankuak enpresa likidatzea erabaki zuen. Prozesuarekin nekatuta, beren kontratuak likidatzea nahiago izan zuten 775 langileetatik gehienek. Baina, gutxi batzuek urteetan borroka judiziala eta, azken batean, morala egin zuten bidezkotzat jotzen zituzten kalte-ordainak lortzeko. Azkenik, urteetan borrokan egon ondoren, 1995ean, langile-talde horrek epaiketa irabazi egin zuen.
Horrela, lehengo langile talde horrek funts bat sortu zuen kaleratzeagatik jaso zituzten kalte-ordainen zati batekin. Bereziki kooperatiben ereduak aplikatuz, kalitateko lantokiak sortzea helburu zuten proiektu ekonomikoak sustatzea zen talde honen nahia.
Hasiera
1995eko ekainaren 19an, funts horrekin, Coop57 sortu zen, finantza-zerbitzuen kooperatiba izateko formula juridikoarekin. Hasieran, lan elkartuaren kooperatibismoarekin oso lotuta egon zen haren garapena, baina pixkanaka bere oinarri soziala ekonomia sozial eta solidarioko beste erakunde mota batzuetara zabalduz joan zen. Aldi berean, bazkide laguntzaileen basea ere hazi egin zen.
Gaur egunera arte
2005etik aurrera, Coop57k sarean hazteko eredu bat jarri zuen martxan, esperimentu honek beste lurralde batzuetan sortu zuen interesaren ondorioz. Urte hartan, Aragoiko eta Coop57ko ekonomia sozial eta solidarioko erakundeen sare batek proiektua partekatzea erabaki zuen. Coop57ren eredua, egitura juridikoa eta egitura teknikoa aprobetxatzea izan zen asmoa, baina lurralde bakoitza autogestionatzea ahalbidetuko zuen eredu bat aplikatuz. Horren ondorioz, Coop57 Aragon sortu zen, sareko garapenaren planteamenduan oinarrituta.
Printzipio horien arabera, gerora eratu ziren Coop57 Madril (2006), Coop57 Andaluzia (2008) eta Coop57 Galiza (2009). Kasu horietan guztietan, Coop57ren lurralde sailak osatzeko arrakastaren gakoa izan da ekonomia sozial eta solidarioko sare bat egotea hura kudeatzeko gai den lurraldean bertan.