Durante o primeiro semestre deste ano, Coop57 atendeu numerosas solicitudes de financiamento de investimentos para a adquisición, adecuación e/ou posta en marcha de equipamentos e locais de movementos sociais e de entidades de economía social e solidaria. En concreto, formalizou 14 operacións por un valor conxunto de 2.292.459,58€.
Desta forma, o apoio financeiro prestado serviu para mellorar e consolidar espazos ao servizo da transformación económica e social: desde unha cooperativa de consumo de Cornellá de Llobregat ata a soberanía tecnolóxica en clave cooperativa en Errenteria, pasando por un Centro de Desenvolvemento Infantil e Atención Precoz de Gavá; “co-workings” asociativos e cooperativos tanto no barrio madrileño de Portelo-Almenara como no barrio barcelonés de Nou Barris; unha carpintería cooperativa en Badalona, unha cooperativa de ensino de Gràcia ou un centro cultural cooperativo para apoderar a artistas migrantes, mulleres e disidencias no Raval barcelonés.
Destacan os préstamos concedidos a entidades asociativas tan emblemáticas como A Vilá de Vallekas, un centro social autoxestionado que agrupa a 15 colectivos moi diversos (desde entidades de economía social e solidaria a iniciativas veciñais); o histórico Lokal do Raval, epicentro libertario de movementos sociais de Barcelona; a tamén histórica Associació Cultural i Esportiva GER de Ribes, na comarca barcelonesa do Garraf, un espazo de debate e axitación política, cultural e social; e Ca Bassot de Burjassot, un casal popular que centra a súa actividade no antifascismo, a memoria histórica, a cultura popular e valenciana, o territorio, o ecoloxismo e o feminismo.
Se abrimos a mirada, desde 2022 concedéronse case 8 millóns de euros en máis de 40 novos préstamos que serviron para facilitar ás entidades o desenvolvemento da súa actividade e garantir que teñen o espazo imprescindible onde poder realizala.
