Coop57 ekonomia sozial eraldatzaileko entitateen zerbitzura dagoen finantza-tresna bat gara. Proiektu eraldatzaileek hazteko, sendotzeko eta beren komunitateen beharrei erantzuteko behar duten laguntza aurki dezaten lan egiten dugu. Askotan, ordea, eguneroko gastuei eustea erronka handia da: kutxako fluxu irregularrek, atzeratzen diren ordainketek edo kostu igoera puntualek tentsioan jar dezakete edozein erakunderen diruzaintza. Horregatik, kooperatiba edo entitate batek aurrera egiten jarraitzeko arnasa behar duenean, badaki Coop57-n haien ondoan egongo garela.
Kooperatiban ez ditugu atzean uzten gizartean eragina duten proiektuak. Alderantziz: gure izateko arrazoiaren erdigunea dira. Horregatik, finantzaketa-mota desberdinak ditugu, ekonomia eraldatzailearen erritmo eta berezitasunetara egokitzeko pentsatuta. Gaur, epe laburreko maileguetan jarri nahi dugu arreta, tresna hori funtsezkoa bihurtu baita erakunde askorentzat.
Finantzaketa-mota horri esker, ohikoak diren egoerak gaindi daitezke, hala nola aldi baterako likideziarik eza, diru-sarrerak sortu aurretik aurre egin beharreko produkzio-kostuak estaltzea edo dirulaguntza publikoak kobratzeko atzerapenari erantzutea. Kasu horietan guztietan, aurrerakin bat erabakigarria izan daiteke: soldatak bermatzeko, zerbitzuak aktibo mantentzeko edo pertsonen bizitzan eragin zuzena duten jarduerak geldiaraztea saihesteko.
Egia esan, laguntza hori gabe, zenbait erakundek beren jarduera gelditu edo balio sozial handiko proiektuei uko egin beharko liekete. Horregatik, epe laburreko maileguak eta kreditu-polizak Coop57-ren finantzaketa-mota nagusietako bat bezala finkatu dira. Gaur egun, emandako mailegu guztien % 66 dira, eta urriaren amaieran 14,2 milioi euro finantzaketa-mota horietarako bideratuta zeuden. Honek argi uzten du aipatutako tresnak zenbateraino erantzuten dion kooperatibaren sarearen barruan dagoen behar erreal eta partekatu bati.
Kopuruetatik harago, ordea, baliabide horiek jarduteko modu bat azaltzen dute: une zailetan entitateei laguntzea, proiektuen iraunkortasuna erraztea eta eraldatzeko gaitasuna indartzea. Izan ere, ekonomia eraldatzaileak arnasa hartzen duenean, komunitate osoak ere arnasten du.
